بغداد ۔6جون (اے پی پی):وزیر خارجہ بلاول بھٹو زرداری آکھیے پاکستان تے عراق بھرا ملک ہن جیڑھے جو تکڑے تاریخی، ثقافتی اتے مذہبی وابستگیاں نال جڑیے پئن ، ݙوہیں پاسوں ھک ݙوجھے کیتے بے پناہ نیک خواہشات موجود ہن، مشترکہ منصوبیں تے تعاون دے ذریعے اپݨے برادرانہ تعلقات کوں مستحکم کرݨ دا اے بہترین وقت اے۔ منڳل کوں دفتر خارجہ موجب اے ڳالھ انہاں دورہ عراق دے دوران بغداد اچ پاکستانی تے عراقی تاجر برادری دے نمائندیں توں خطاب کریندے ہوئیں آکھی اے ، انہاں آکھیے صدر، وزیر اعظم اتے عراقی ہم منصب دے نال ڳالھ مہاڑ اچ اساں ݙو طرفہ تجارت اتے سرمایہ کاری ودھاوݨ ، بنیادی ڈھانچے دی تعمیر نو اچ عراق دے نال تعاون اتے پاݨی دے انتظام اتے زراعت اچ مہارت دے اشتراک سودھے مختلف شعبیں اچ تعاون ودھاوݨ تے ڳالھ مہاڑ کیتی ۔ وزیر خارجہ آکھیے اساں تعاون دے نویں تے اختراعی خیالات کوں تلاش کرݨ دا عزم کیتے جیں اچ کنیکٹیویٹی، بندرگاہواں دے رابطے اتے دفاعی پیداوار دے شعبیں اچ تعاون شامل ہن، ݙوہیں ملکاں دی کاروباری برادری دی سہولت کیتے اساں تاجراں تے سرمایہ کاراں کیتے ویزا دے لچکدار نظام اتے کاروباری وفد دے تبادلے تے تبادلہ خیال کیتا۔ انہاں آکھیے پاکستان کاروبار کرݨ اچ سوکھ دے آپݨے اقدام دے ھک حصے دے طور تے پاکستان آوݨ آلے غیر ملکی سرمایہ کاراں کیتے ویزا دی سہولت اتے لمبی مدت دے ویزے دے اجراء کیتے پہلے ہی انتظامات کیتن ۔ بلاول بھٹو زرداری آکھیے پاکستان تے عراق ݙو مفاہمتی یادداشتاں تے دستخط کیتن جنہاں دا مقصد ثقافتی تعاون کوں مزید ودھاوݨ تے سفارتی تے سرکاری پاسپورٹ ہولڈرز کیتے ویزا چھوٹ دی سہولت اچ توسیع کرݨا اے۔ انہاں آکھیے اے اقدامات تجارت تے سرمایہ کاری دے ودھارے کیتے لوکاں وچال رابطیں تے اعلیٰ سطح دے تبادلیں کوں کافی حد تئیں ودھارا ݙیسن ۔ وزیر خارجہ آکھیے زائرین متعلق مفاہمت نامے دا مقصد زائرین دی مقدس مقامات دی زیارت کیتے قانونی نقل و حرکت کوں سوکھا بݨاوݨا اے ۔ انہاں آکھیے اے ڳالھ ٻہوں چنڳی اے جو عراق نجف اچ قونصل خانہ کھولݨ دی ساݙی درخواست تے اتفاق کیتے، اے مثبت پیش رفت ݙو طرفہ تعلقات دی رفتار کوں مزید اُتے گھن ویسی ، انہاں ایں یقین دا اظہار کیتے جو ݙوہیں پاسوں دی کاروباری برادریاں انہاں انتظامات توں فیدہ چیسن جیڑھے ساݙے برادرانہ اتے تاریخی تعلقات دے مطابق تجارت ودھاوݨ اچ معاون ثابت تھیسن۔ وزیر خارجہ بلاول بھٹو زرداری آکھیے اساں آپݨی کاروباری برادری کوں سہولت ݙیوݨ تے عراق توں پاکستان کوں رقم دی منتقلی دے سلسلے اچ حائل رکاوٹاں کوں دور کرݨ کیتے وی ڳالھ مہاڑ کریندے پیوں ۔
