اسلام آباد۔7اگست (اے پی پی) وزیراعظم محمد شہباز شریف ملک دی ودھدی آبادی اتے ایں دے مسئلیں نال نبݨݨ کیتے صوبیں دے تعاون نال مؤثر حکمت عملی تیار کرݨ دی ہدایت کریندیں آکھیے جو ایں بارے قومی سطح دی پالیسی ویلھے دی اہم لوڑھ اے۔ وزیراعظم دفتر دے میڈیا ونگ توں جاری بیان موجب وزیر اعظم محمد شہباز شریف دی صدارت اچ ملک اچ ودھدی آبادی اتے ایں دے مسئلیں دے حل کیتے اقدامات دا جائزہ گھنݨ کیتے اجلاس منعقد تھیا۔ اجلاس توں خطاب کریندیں وزیراعظم آکھیا جو “پاکستان اچ آبادی دے ودھݨ دی سالانہ شرح 2.55 فیصد اے، تکھے ودھدی آبادی دی ترقی اتے ایں کوں معیشت دا فعال حصہ بݨاوݨ کیتے منصوبہ بندی دی لوڑھ اے۔ وزیراعظم آکھیا جو ملکی آبادی دا وݙا حصہ نینگراں تے مشتمل اے جیڑھا اساݙے ملک دا ٻہوں اہم اتے قیمتی اثاثہ ہن، حکومت نینگراں کوں ملکی معیشت دی ترقی کیتے کردار ادا کرݨ دے موقع ݙیوݨ کیتے ٻہوں سارے اقدامات کریندی پئی اے۔ انہاں آکھیا جو “تریمتاں اساݙی افرادی قوت دا ٻہوں وݙا حصہ ہن۔ انہاں ہدایت کیتی جو “تریمتاں کوں ملازمت دے ودھ توں ودھ موقع ݙیوݨ کیتے اقدامات کیتے ونڄن۔” وزیراعظم ودھدی ہوئی آبادی اتے ایں دے مسئلیں نال نبݨݨ کیتے صوبیں دے تعاون نال مؤثر حکمت عملی بݨاوݨ دی وی ہدایت کیتی۔ انہاں آکھیا جو ایں بارے قومی سطح دی پالیسی ویلھے دی اہم لوڑھ اے۔ وزیراعظم مؤثر پالیسی اتے حکمت عملی بݨاوݨ کیتے کمیٹی تشکیل ݙیوݨ دی وی ہدایت کیتی۔ اجلاس اچ ایں بارے مختلف تجویزاں پیش کیتیاں ڳئن۔ اجلاس کوں ݙسایا ڳئے جو صوبیں دے تعاون نال ودھدی ہوئی آبادی اتے ایں دے مسئلیں تے قابو پاوݨ کیتے ہک قومی سطح دی پالیسی دی لوڑھ اے اتے معاشی ترقی دے تناظر اچ ودھدی آبادی کیتے عوام اچ قومی سطح تے آگاہی مہم چلاوݨ ضروری اے۔ اجلاس اچ وفاقی وزیر منصوبہ بندی و ترقی ڈاکٹر احسن اقبال، وفاقی وزیر تعلیم ڈاکٹر خالد مقبول صدیقی، وفاقی وزیر اطلاعات و نشریات عطا ء اللہ تارڑ، وفاقی وزیر مذہبی امور سردار محمد یوسف، وفاقی وزیر قانون اعظم نذیر تارڑ اتے متعلقہ اداریں دے اعلیٰ حکام شریک ہن۔
