اسلام آباد۔ یکم اکتوبر(اے پی پی) وفاقی وزیر داخلہ محسن نقوی عوامی جمہوریہ چین دے 76ویں قومی ݙینھ تے چینی قیادت، کمیونسٹ پارٹی تے عوام کوں مبارخ ݙیندے آکھیا جو چین ٻہوں گھٹ ویلھے وچ معاشی استحکام تے پائیدار ترقی دے خواب کوں پورا کیتے تے استقامت، اصولاں دی پابندی تے اجتماعی فلاح دے جذبے نال دنیا وچ اُچا مقام حاصل کیتے۔ محسن نقوی آپݨے پیغام وچ آکھیے جو چین دی معاشی، سماجی تے فوجی میدان وچ غیر معمولی کامیابیاں نہ صرف اوں دی آپݨی ترقی بلکہ پورے خطے دے استحکام تے خوشحالی دا سبب ہن۔ انہاں چین دی شاندار تاریخ، ثقافتی ورثے تے حیرت انگیز ترقی دی تعریف کریندے آکھیے جو پاک چین تعلقات تاریخی، اسٹریٹجک تے مضبوط شراکت داری تے مبنی ہن۔ انہاں آکھیا سی پیک جیھے عظیم منصوبے ایں شراکت داری دی روشن مثال ہن ۔ وزیر داخلہ آکھیا جو چین ہر بحران، علاقائی تناؤ یا اندرلے چیلنج دے دوران پاکستان دا بھرپورساتھ ݙتے تے ایہو وجہ اے جو چین دے نال تعلقات پاکستان دی خارجہ پالیسی دا مستقل تے مرکزی ستون ہن۔ وفاقی وزیر داخلہ قومی ݙینھ تے چینی قوم دی لگن، محنت تے جدت پسندی کوں سلام پیش کریندے اوں دی مزید ترقی، کامیابی تے عروج کیتے نیک خواہشات دا اظہار کیتے۔
