اسلام آباد۔ 21 اگست(اے پی پی)برطانیہ دے وزیراعظم سر کیئر اسٹارمر پاکستان اچ حالیہ سیلاب دے متاثرین نال یکجہتی کریندے آکھیے جو برطانوی حکومت بحالی اتے تعمیر نو اچ پاکستان دی ہر ممکن مدد کرݨ سانگے تیار اے۔ برطانوی وزیراعظم سر کیئر اسٹارمر پاکستان اچ حالیہ مون سون اتے سیلابی صورتحال پاروں تھیوݨ آلے جانی اتے مالی ضیان تے وزیراعظم محمد شہباز شریف کوں لکھیے گئے خط اچ وزیراعظم اتے پاکستانی عوام نال جانی ضیان تے دلوں ہمدردی اتے افسوس کیتے۔ برطانوی وزیراعظم آکھیا جو او برطانوی حکومت اتے عوام ولوں پاکستان اچ حالیہ سیلاب اچ وݙے پیمانے تے تھیوݨ آلی تباہی تے افسوس کریندن، انہاں دیاں دلوں ہمدردیاں سارے متاثرین دے نال ہن، برطانیہ اچ رہݨ آلے پاکستان دے ٻہوں سارے خانداناں کیتے اے چنتے دی ڳالھ اے، سارے برطانوی عوام پاکستانی عوام نال ایں اوکھے ویلھے اچ یکجہتی کریندن۔ برطانوی وزیراعظم ایں صورتحال اچ ایمرجنسی رسپانس اتے ٻہوں اوکھے حالات اچ متاثرین دی مدد کرݨ آلے رضاکاراں کوں خراج تحسین پیش کیتا۔ انہاں آکھیا جو اے اطمینان دی ڳالھ اے جو ایں موقعے تے برطانوی حکومت پاکستان دی مدد کیتی اتے اڳوں وی بحالی اتے تعمیر نو سانگے برطانوی حکومت پاکستان دی ہر ممکن مدد دا عزم کیتے۔
