اسلام آباد۔2مارچ(اے پی پی) نائب وزیراعظم و وزیر خارجہ سینیٹرمحمد اسحاق ڈار، وفاقی وزیر خزانہ سینیٹر محمد اورنگزیب اتے وفاقی وزیر قانون و انصاف سینیٹر اعظم نذیر تارڑ 4مارچ منڳل کوں کمپیٹیشن کمیشن آف پاکستان (سی سی پی) دے ہیڈ آفس دی عمارت دا سنگ بنیاد رکھیسن ۔ تقریب اچ پالیسی ساز، وفاقی سیکرٹریز، بزنس کمیونٹی دے نمائندے اتے سی سی پی حکام سودھے اہم سٹیک ہولڈرز شرکت کریسن ۔کمپیٹیشن کمیشن دا نواں ہیڈکوارٹرز فن تعمیر دا شاہکار ہوسی۔ جدید ٹیکنالوجی توں مزین اے سمارٹ تے محفوظ بلڈنگ توانائی دی بچت اچ اہم کردار ادا کریسی تے سارے ملازمین ھک چھت تلے کم کرسڳسن ۔ بلڈنگ اچ گرین ایریاز ہوسن جیں توں پیشہ ورانہ ماحول اچ بہتری آسی ، ایں توں انڄ اپݨی بلڈنگ دی بدولت کمیشن کوں ماہانہ کرایہ ادا نہ کرݨا پوسی جیں توں کمیشن مالی طور تے مزید مستحکم تھیسی۔ کمپیٹیشن کمیشن دے نویں ہیڈ آفس دے سنگ بنیاد دے حوالے نال چیئرمین سی سی پی ڈاکٹر کبیر احمد سدھو آکھیے اے ہیڈ آفس محض سلھاں تے پتھر توں بݨی ھک عمارت نی بلکہ اے ھک مستحکم اتے پائیدار کمپیٹیشن کمیشن دے قیام دے پاسے ساݙے غیر متزلزل عزم دی علامت اے، سی سی پی مستقبل اچ ملک دے ٻئے وݙے شہراں اچ وی اپݨے دفتر بݨیسی ۔ کمپیٹیشن کمیشن گزریل ھک سال اچ کارٹلائزیشن، ملی بھگت اتے گمراہ کن مارکیٹنگ کرݨ تے کاروباری اداریں کوں 275 ملین روپے دے جرمانے لاتے ، جݙاں جو مجموعی طور تے 100 ملین روپے دے جرمانے وصول کیتے۔ کمیشن عدالتاں اچ زیرسماعت 73 مقدمیں کوں توڑ پڄائے۔
