اسلام آباد۔27اگست (اے پی پی) وزیراعظم محمد شہباز شریف آکھیے جو پاکستان کوں سرمایہ کاراں اتے سرمایہ کاری کیتے محفوظ ملک بݨاوݨ کیتے پُرعزم ہاں ، پاکستان اتے جاپان وچال ماضی اچ صنعت و وپار دے شعبے اچ بھرپور تعاون رہیے، پاکستان جاپان دے نال سفارتی اتے معاشی تعاون کوں قدر دی نگاہ نال ݙیکھدے۔ وزیراعظم دفتر دے میڈیا ونگ توں جاری بیان موجب اے ڳالھ انہان جاپان دے بین الاقوامی تعاون بنک دے شعبہ مائننگ اتے میٹل فائنانس دے ڈائریکٹر جنرل تارو کاٹو نال ڳالھ مہاڑ کریندیں آکھی جنہاں وزیراعظم نال اتھاں ملاقات کیتی۔ وزیراعظم آکھیا جو پاکستان جاپان دے نال سفارتی اتے معاشی تعاون کوں قدر دی نگاہ نال ݙیکھدے، پاکستان اتے جاپان وچال ماضی اچ صنعت تے وپار دے شعبے اچ بھرپور تعاون رہیے۔ ݙوہیں ملک معاشی تعاون دی نویں تشکیل کیتے پُرعزم ہن۔ انہاں آکھیا جو پاکستان جاپانی سرمایہ کاراں اتے بینکاں دی پاکستان اچ سرمایہ کاری کیتے ہر ممکن سہولتاں ݙیسی۔ انہاں آکھیا جو پاکستان زراعت، آئی ٹی، ٹیکسٹائل اتے ݙوجھے شعبیں اچ جاپانی ٹیکنالوجی دی جدت اتے پیشہ ورانہ مہارت توں فیدہ حاصل کرسڳدے، پاکستان اچ وݙے معاشی اتے ترقیاتی منصوبیں اچ عالمی مالیاتی ادارے اتے بین الاقوامی سطح تے سرمایہ کار آپݨی بھرپور دلچسپی دا اظہار اتے تعاون ݙیندے پئن ۔ انہاں آکھیا جو پاکستان دی سستی لیبر مارکیٹ بین الاقوامی سرمایہ کار کوں مقابلہ کرݨ آلا ماحول ݙیندی اے، پاکستان کوں سرمایہ کار اتے سرمایہ کاری کیتے محفوظ ملک بݨاوݨ کیتے پُر عزم ہاں۔ جاپان دے بین الاقوامی تعاون بنک دے شعبہ مائننگ اتے میٹل فائنانس دے ڈائریکٹر جنرل تارو کاٹو پاکستان اچ مہمان نوازی تے حکومت پاکستان اتے پاکستانی عوام دا شکریہ ادا کیتا اتے جاپان دے سرمایہ کاراں اتے بینکاں دی پاکستان اچ معاشی پراجیکٹاں اچ ودھدی ہوئی دلچسپی اتے تعاون کوں مزید ودھاوݨ دی خواہش دا اظہار کیتا۔
